Tuesday, February 3, 2015

عيش فينو

* تصدق بالله يا راجل يا طيب، انا من ساعة ما رجعت وانا بصرف فلوس عمال علي بطال بسبب الغش الموجود في كل شيء. لدرجة اني جاي افتح حنفية الصبح، اتقطمت في ايدي من قلب الحيطه.

- يا حول الله، معلش يا دكتور الناس معندهاش ضمير.

* الغريب في الموقف اني اتصلت بالسباك الي عمل السباكه كلها واشتري جميع تركيباتها، وقالي معلش اصل الجلبة انتمونيا تعبانه (خليط من البلاستيك ومواد اخري). 

- يعني هو الي اشتراها وهو الي بيقول عليها تعبانه؟

* تخيل!، لكن ده اهون من الي حصلي امبارح لما نزلت اشتري ثلاجة لأختي وقعدنا نلف علي الموديل الي عايزينه. وملقنهاش بسعر كويس غير عند (جراند هوم). وانا عمال الف علي الموضوع ده من الصبح وتليفونات لما دماغي صدعت.

- طب وبتلف ليه؟

* لان الشركة النصابه بعتتلي ثلاجه موديل مختلف، اقل في الحجم  واسوء في الكهرباء وسعرها طبعا مختلف تماما ما يزيد عن الف ونصف فرق في السعر، غيرانه موديل قديم معدش بينزل. و خصوصا اني كنت طالب موديل بعينه عشان عندي منه في البيت وعارفه كويس.

- طيب وعملت ايه؟

* دوخوني وقالولي هات كود الموديل، وفعلا طلع الكود مختلف لكن للاسف الكود مش مثبت في فاتورة الشراء والمسئوله عماله تستهبل، وبلغوني انهم هيردوا علي النهارده الصبح. واتصلت بيهم الصبح لقيت المسئوله الغريبه بيتقولي مفيش مشاكل هاتلنا الثلاجه عشان نتأكد. قلتلها يعني ايه هاتلنا الثلاجه، يعني انا اتكفل بنقلها بعد الشراء وكمان عوزاني اجبهالك عشان تتأكدي يعني احتمال تطلع هي وارجع بيها تاني مثلا، حضرتك ابعتي حد يتأكد.

- ايه الناس دي؟!

* فعلا بعتولي 2 بعربية النقل الخاصه بالشركه وده استفزني اكتر لاني نقلتها علي تروسكل كان واقف قدام الشركه لما اشتريتها. والبيه الي بعتنهولي عمال ينفس نار من ساعة ما دخل ومجرد ما رجله لمست المطبخ حتي قبل ما يشوفها قالي، ما هي دي الثلاجه، قلتله هي دي ازاي  دي حتى حجمها اصغر، قالي ما هي كبيره وكويسه. قلتله لو سمحت بص علي بيانات حجم الثلاجه والموديل وقصر في الكلام. المهم فعلا اتأكد وقالي الشركه هتتصل بحضرتك.

- ايه الحوار الطويل ده واتصلوا !

* يا ريت،محدش اتصل. بعد العصرقمت انا اتصلت بيهم وبمنتهي البرود قالتلي دي ثلاجه نفس الحجم لكن موديل قديم فعلا. قلتلها تمام يا ريت حضرتك تبعتي الثلاجه الثانيه وتاخدوا الموجوده. قالتلي للأسف الثانيه مش موجوده عندنا، قلتلها بسيطه حضرتك ابعتي خدي ثلاجتكم وانا هاجي استلم الفلوس وربنا يعوض علي في فلوس النقل. قالتلي حضرتك هاتهلنا. قلتلها: يعني حضرتك شايفه اني اتحمل 50 جنيه نقلها رايح و 50 جنيه في رجوعها وانا مليش ذنب ده غير انكم عندكم عربيه خاصه بالنقل.قالتي يا فندم دي عربية المعرض.
 قلتلها مفيش مشاكل حضرتك لو شايفه ان ده حل مناسب انا هجبلكم الثلاجه، لكن تأكدي انكم هتخسروا اكثر من خسارتي دي بكتير. قالتلي طيب يا فندم هرد علي حضرتك بعد  ربع ساعه.

- وحصل ايه؟

* بعد ربع ساعه اتصلت قالتلي، عربيتنا هتوصل عند حضرتك تستلم الثلاجه القديمه وترجعها، وبعدين هنسلمك الثلاجه الجديده.

- يعني الثلاجه التانيه طلعت عندهم؟

* شفت!، المهم فعلا العربيه جت تستلمها واهم حاجه عندهم الكارتونه متطلعش مقطوعه، لكن للاسف كانت دبابيسها مفكوكه من الجانب، فالمندوب حب يتنرفز، قلتله بقولك ايه، هات التلاجه الثانيه وخد كارتونيتها وريح دماغك، لكن هاتها هنا الاول بكارتونتها.

- تمام.

* للاسف طلع انسان سخيف واخد الكارتونه القديمه وهو ماشي وبدل الكارتونه هناك ورجع الثلاجه الجديده بالكارتونه القديمه وفيها خبطه بسيطه زي ما توقعت.

- وعملت ايه؟!

* هما شافوا علي وشي ملامح الغضب راحوا بسرعه قايلنلي تحب يا باشا ندخلهالك المطبخ (لان الباب ضيق ودخولها محتاج مجهود و حركات خاصه). قلتلهم دخلوها، والدي كان واقف قالي اديهم اكراميه، قلتله، دول عاوزين البوليس. والموضوع انتهي، و الحمد لله علي كل شيء

-  الحمد لله.

* عرفت بأه يا راجل يا طيب، ده غير قصة الستائر، والميكانيكي وحجات كتير، ربنا يعفوا عنا وعنك.

- اللهم امين، معدش في ضمير.

* اه والله، علي العموم هاتلي بـ 3 جنيه عيش فينو "بس الله يكرمك هاتهم طازه عشان الي ادتهوملي امبارح كانوا بايتين وميتاكلوش".