Monday, August 10, 2015

رسالتي لطالب الحاسبات والمعلومات >> الجديد


عزيزي طالب الحاسبات الجديد، ركز معايه!

الكلية اسمها الحاسبات والمعلومات، تتبع قطاع خاص بها اسمه ايضا الحاسبات والمعلومات، و لازم تعرف ان في معاهد خاصه كتير بتتمحك في اسم  الكلية عشان تعمل business واسمها بيكون مشابه لكنه يحتوي علي كلمة اداره او تجاره وبيكون تابع لقطاع كليات التجاره وليس قطاع الحاسبات.

الكليه ليس لها نقابه حتي الان، والوظايف الحكوميه هتسميك اخصائي حاسب، فلو دي نقطه ممكن تهمك حول هندسه خاصه وريح نفسيتك ومتكملش الرساله دي. الكليه غير معروفه في مجتمعنا الجاهل الجميل وغالبا الناس هتفتكرك في معهد، ولو حاولت تجادل هيتأكدوا انك في معهد فلو دي حاجه هتضايق يبأه نفس النصيحه وحول هندسه خاصه وريح دماغك ومتكملش الرساله.

خلصنا الكلام الي هينغص عيشتك وندخل علي الكلام المهم:

بالنسبه لباقي التخصصات في مصر الكليه نسبة الشغل لخريجيها 99% و الـ 1% الباقي اكيد اشتغل وظيفه تانيه مش قاعد في البيت واغلب خريجين حاسبات حاليا بيشتغلوا مهندسين برمجيات في شركات خاصه، وفي الخليج وكتير جدا في امريكا واوربا، انما لو قلوا عقلهم بيشتغلوا اخصائيين حاسب في جهات حكوميه في مصر.

الحاسبات والمعلومات اربع سنوات فقط، و بها قسمين اساسيين في اغلب الكليات، علوم حاسب ونظم المعلومات، وبعض الكليات بها 3 او اربع اقسام، والتخصص بيكون من سنه 3 غالبا، فمتشغلش بالك بالاقسام من دلوقتي.

مشاكل الكليه زي باقي التعليم في مصر وهي نقص التمويل الحكومي ونقص المعامل، وضعف الاداره، واهمال بعض الدكاتره الناتج برده عن ضعف التمويل الحكومي.

لكن ميزتها عن باقي كليات مصر انك لا محتاج المعامل، ولا هتحتاج حتي للدكاتره. بشرط انك تكون راجل لمدة 4 سنين، ويكون عندك لاب توب، وخط انترنت بسرعه كويسه. الكليه سهله جدا لكن عاوزة تركيز من اول يوم، وفي بعض الاحيان هيكون مطلوب منك تذاكر ببطريقتين طريقه عشان تفهم الي الدكتور عاوزه وتعرف تكتبهوله في امتحانه والطريقه التانيه عشان تفهم التخصص نفسه وتعرف تشتغل بعذ التخرج.
والظريف ان في ماده برمجة واحده لو فهمتها تقدر تعدي 7 او 8 مواد بسببها. والاظرف انك ممكن تذاكرها لوحدك ادخل علي sallamah.weebly.com/c-2015-s.html 
هتلاقي شرح للماده بالفيديو، وخلص الكليه في الشهر الاجازه ده حتي قبل ما تدخلها :D بالتوفيق

Monday, July 6, 2015

معلمي الصغير

الاطفال هم أهم مراحل التعلم في حياة اي شخص بالغ، فإذا اردت ان تدرك جمال وسهولة اللغه العربية علي سبيل المثال فأجعل طفل صغير استاذك، وعلمه اولا الحروف والتشكيل واعطه مصحف.

وبالرغم من ان الحصيلة اللغوية للأطفال ضعيفة جدا، اي انه لا يدرك كثيرا من الكلمات، سوف يبهرك بقدرته علي قراءة القراّن الكريم، وهذا لا يحدث في اي لغه اطلاقا. فمثلا لتستطيع ان تنطق احد الكلمات اللاتينيه،  امامك حلين إما أن تسمعها من احد المتحدثين بهذه اللغه، أو تلجأ لما يطلق عليه * (Internationa Phonetic Alphabet (IPA وهي مجموعه من الحروف مختلفه تماما عن حروف الكلمه الاصليه فمثلا نطق daughter  بالانجليزيه هو /ˈdɔː.tər/.
اما اللغه العربيه فهي ابسط واقوي من ذلك بكثير فلا تحتاج إلا مجموعه من العلامات الموجوده علي كل حرف لتستطيع النطق به وهو ما نطلق عليه التشكيل.

ادعوا لمن وهم اجيالا كامله بصعوبة اللغه العربية بالهداية، واتمني ان يفتح الله علينا بها وبالقراّن الكريم.  ولنتأمل في اطفالنا فهم خير وسيلة لندرك بهم ما قد فقدناه.

---
https://en.wikipedia.org/wiki/IPA_pulmonic_consonant_chart_with_audio

Saturday, June 27, 2015

موظف مرموق!

أمسح النظاره كل بضع دقائق لأتأكد انه لا عيب فيها، ولكن مازالت شبكة من الخطوط الطوليه والعرضيه الرماديه يتخللها بعض الخطوط الصفراء الباهته تغطي عيني. 
لا ادري إن كان هناك خلل في عيني يحتاج العلاج ام أن هذه الشبكه اصبحت جزء من الغلاف الجوي المحيط بنا!. ورغم كوني في وظيفة مرموقه اجتماعيا، وحقيقة لا ادري تفسير لكلملة مرموقه حتي الان وانا احاول جاهدا ان احافظ علي حياة شريفة و كريمه استطيع من خلالها توفير بعض المال لشراء سكن استطيع ان استضيف فيه اصدقائي او حتي تغيير السياره لعلي احافظ علي يداي نظيفتين رغم انسي بكم المعارف التي جمعتني باخواني من الصنايعيه والاوقات الطويله التي قضيتها في ورشهم حتى اصبح بيننا عيش وملح  بالاضافة إلي رحمتي من جشع السائقين او من دين لاحد نفايات السيارات التي يستطيع المواطن المرموق مثلي ان يتحمل اقساطها لتودي بحياته في النهايه مع اول مطب او ملف.
اهون علي نفسي واتأمل حال الناس من حولي في كل لحظه فلا يمر لي من خلال هذه الشبكه الا مشاعر اليأس والانكسار والذل التي يعيشون فيها. ويزيد حزني انه لا ظهر لهؤلاء البسطاء بعد الله الا طبقتنا المرموقه!. فاحمد الله علي الصحه والعافيه واتململ في خيوط رحمته ان يحافظ علي صحة اهلي الذين لا يغطيهم التأمين الصحي، اقصد التأمين الصحي  الذي توفره الجامعه لأن لا احد يفكر ان يرمي بأهله الي التأمين الصحي  الذي تغطيه الدولة والا فقد كفر باية الله في قولة "وأنفقوا في سبيل الله ولا تلقوا بأيديكم إلى التهلكة وأحسنوا إن الله يحب المحسنين".
اشد من ازر نفسي واتذكر قول احد المعلمين "خلق الرجال للشقاء" فأقول: مالي امتعض بدون حراك يجب ان اسعي، فلا اجد غير الجامعات الخاصه التي تدار بعقول تجاريه لتستنذف ابنائنا وتتجار بعلمائنا حتي يصبح الجميع ترس في ماكينة لطباعة الفلوس لبعض التجار ومتملقي السلطة.
اذا لاعود للبحث العلمي فهو السبيل لخروجي من هذا الشعور السلبي، ولكن الساعه الان الثانية عشر ونصف بعد منتصف الليل وسوف ابدأ في الدوران مرة اخرى مع اذان الفجر. ... ممم النوم خير من البحث.


Sunday, April 19, 2015

غراب ،،، و مصري


في صباح الجمعة السابقة واثناء عبوري مدخل العمارة التي اسكن فيها، وجدت جاري يقف امام المدخل وينظر لأعلي ويلتفت يمينا ويسارا بسرعة بالغة فألقيت عليه التحيه، فردها دون ان ينزل نظره. وقال لي: "في غرابين نازلين نقر في دماغ الناس متعرفش ايه الحكاية"؟

فشرد ذهني للحظه عندنا تذكرت نفس الشكوي من جار اخر،  وكانت صلعة جاري المتحدث تلمع امامي في شمس هذا الصباح الجميل نظرا لقصر قامته التي جعل رأسه في محل نظري، وبدأ عقلي يربط بينه وبين جاري الاخر وقلت لنفسي:" يمكن عشان انتم الاثنين قرع"؟

فتحسست رأسي، واستعذت بالله، وتذكرت انها لا تدوم لأحد ثم رددت عليه وقلت " مش عارف والله ايه الحكايه لكن جارنا الفلاني شكى لي نفس الشكوي." ثم اكملت طريقي وقبل ان ابتعد نظرت خلفي فوجدت جاري يسير مسرعا وفي يده عصا واحد الغرابين يهبط علي رأسه لينقره، وما ان يلتف اليه  يهبط الاخر من جهة اخري وكان مشهد شديد .الغرابة والسخرية في نفس الوقت

 كنت مسافرا في هذا اليوم واخذت افكر في الامر، واخبرت صديقا لي كان يسافر معي فقال يبدو ان هذه الغربان في موسم التفريخ وان عشها في احد الاشجار التي تحيط بالمدخل فقلت له ربما ،،، واكملنا طريقنا

 في اليوم التالي واثناء عودتي وجدت عدد من الاشجار المكسورة، فلم ينشغل بالي بالامر رغم حزني لما رأيت، لكن عناء السفر كان اكبر من اتوقف لأحلل ما حدث

اليوم واثناء الخروج من المسجد بعد صلاة العصر  نادى علي احد الجيران  وطلب مني مساعدته في ازاحة احد الاشجار  المكسور عن الطريق واثناء قيامنا بذلك لاحظت عش الغراب بين اغصان هذه الشجرة فاخبرت جاري بذلك فقال لي، نعم بالفعل والغراب  صاحب العش يقف الان فوق سطح العمارة المقابلة ويراقب ما نقوم به

نظرت إلي اعلي، وقلت لنفسي الم يكن هناك طريقة افضل لمعالجة هذا الموقف فقد يقوم الالمان بنقل الشجرة كلها لمكان اخر بعيدا عن السكان لحمايتها وحماية الغراب وقد يقوم الصينيين باصدار امر لارتداء قبعة او فتح مظله لكل من يريد ان يمر من هذا الطريق، ويبدوا ان الغراب انتبه لأفكاري فألتفت برأسه الي. فهززت رأسي لأبعد هذه الأفكار ونظرت اليه وقلت "لا متسرحش معايه، انت فاكر ايه يعني ، ده انت غراب ،،، و مصري ...







Tuesday, February 3, 2015

عيش فينو

* تصدق بالله يا راجل يا طيب، انا من ساعة ما رجعت وانا بصرف فلوس عمال علي بطال بسبب الغش الموجود في كل شيء. لدرجة اني جاي افتح حنفية الصبح، اتقطمت في ايدي من قلب الحيطه.

- يا حول الله، معلش يا دكتور الناس معندهاش ضمير.

* الغريب في الموقف اني اتصلت بالسباك الي عمل السباكه كلها واشتري جميع تركيباتها، وقالي معلش اصل الجلبة انتمونيا تعبانه (خليط من البلاستيك ومواد اخري). 

- يعني هو الي اشتراها وهو الي بيقول عليها تعبانه؟

* تخيل!، لكن ده اهون من الي حصلي امبارح لما نزلت اشتري ثلاجة لأختي وقعدنا نلف علي الموديل الي عايزينه. وملقنهاش بسعر كويس غير عند (جراند هوم). وانا عمال الف علي الموضوع ده من الصبح وتليفونات لما دماغي صدعت.

- طب وبتلف ليه؟

* لان الشركة النصابه بعتتلي ثلاجه موديل مختلف، اقل في الحجم  واسوء في الكهرباء وسعرها طبعا مختلف تماما ما يزيد عن الف ونصف فرق في السعر، غيرانه موديل قديم معدش بينزل. و خصوصا اني كنت طالب موديل بعينه عشان عندي منه في البيت وعارفه كويس.

- طيب وعملت ايه؟

* دوخوني وقالولي هات كود الموديل، وفعلا طلع الكود مختلف لكن للاسف الكود مش مثبت في فاتورة الشراء والمسئوله عماله تستهبل، وبلغوني انهم هيردوا علي النهارده الصبح. واتصلت بيهم الصبح لقيت المسئوله الغريبه بيتقولي مفيش مشاكل هاتلنا الثلاجه عشان نتأكد. قلتلها يعني ايه هاتلنا الثلاجه، يعني انا اتكفل بنقلها بعد الشراء وكمان عوزاني اجبهالك عشان تتأكدي يعني احتمال تطلع هي وارجع بيها تاني مثلا، حضرتك ابعتي حد يتأكد.

- ايه الناس دي؟!

* فعلا بعتولي 2 بعربية النقل الخاصه بالشركه وده استفزني اكتر لاني نقلتها علي تروسكل كان واقف قدام الشركه لما اشتريتها. والبيه الي بعتنهولي عمال ينفس نار من ساعة ما دخل ومجرد ما رجله لمست المطبخ حتي قبل ما يشوفها قالي، ما هي دي الثلاجه، قلتله هي دي ازاي  دي حتى حجمها اصغر، قالي ما هي كبيره وكويسه. قلتله لو سمحت بص علي بيانات حجم الثلاجه والموديل وقصر في الكلام. المهم فعلا اتأكد وقالي الشركه هتتصل بحضرتك.

- ايه الحوار الطويل ده واتصلوا !

* يا ريت،محدش اتصل. بعد العصرقمت انا اتصلت بيهم وبمنتهي البرود قالتلي دي ثلاجه نفس الحجم لكن موديل قديم فعلا. قلتلها تمام يا ريت حضرتك تبعتي الثلاجه الثانيه وتاخدوا الموجوده. قالتلي للأسف الثانيه مش موجوده عندنا، قلتلها بسيطه حضرتك ابعتي خدي ثلاجتكم وانا هاجي استلم الفلوس وربنا يعوض علي في فلوس النقل. قالتلي حضرتك هاتهلنا. قلتلها: يعني حضرتك شايفه اني اتحمل 50 جنيه نقلها رايح و 50 جنيه في رجوعها وانا مليش ذنب ده غير انكم عندكم عربيه خاصه بالنقل.قالتي يا فندم دي عربية المعرض.
 قلتلها مفيش مشاكل حضرتك لو شايفه ان ده حل مناسب انا هجبلكم الثلاجه، لكن تأكدي انكم هتخسروا اكثر من خسارتي دي بكتير. قالتلي طيب يا فندم هرد علي حضرتك بعد  ربع ساعه.

- وحصل ايه؟

* بعد ربع ساعه اتصلت قالتلي، عربيتنا هتوصل عند حضرتك تستلم الثلاجه القديمه وترجعها، وبعدين هنسلمك الثلاجه الجديده.

- يعني الثلاجه التانيه طلعت عندهم؟

* شفت!، المهم فعلا العربيه جت تستلمها واهم حاجه عندهم الكارتونه متطلعش مقطوعه، لكن للاسف كانت دبابيسها مفكوكه من الجانب، فالمندوب حب يتنرفز، قلتله بقولك ايه، هات التلاجه الثانيه وخد كارتونيتها وريح دماغك، لكن هاتها هنا الاول بكارتونتها.

- تمام.

* للاسف طلع انسان سخيف واخد الكارتونه القديمه وهو ماشي وبدل الكارتونه هناك ورجع الثلاجه الجديده بالكارتونه القديمه وفيها خبطه بسيطه زي ما توقعت.

- وعملت ايه؟!

* هما شافوا علي وشي ملامح الغضب راحوا بسرعه قايلنلي تحب يا باشا ندخلهالك المطبخ (لان الباب ضيق ودخولها محتاج مجهود و حركات خاصه). قلتلهم دخلوها، والدي كان واقف قالي اديهم اكراميه، قلتله، دول عاوزين البوليس. والموضوع انتهي، و الحمد لله علي كل شيء

-  الحمد لله.

* عرفت بأه يا راجل يا طيب، ده غير قصة الستائر، والميكانيكي وحجات كتير، ربنا يعفوا عنا وعنك.

- اللهم امين، معدش في ضمير.

* اه والله، علي العموم هاتلي بـ 3 جنيه عيش فينو "بس الله يكرمك هاتهم طازه عشان الي ادتهوملي امبارح كانوا بايتين وميتاكلوش".

Thursday, January 8, 2015

خمس دقائق بي بي سي

بعد ما فقدت قناة الـبي بي سي مصداقيتها، علي الاقل بالنسبة لي كمثيلاتها من جميع القنوات الاخبارية الاخرى بعد تغطياتها المائعة  والموجهه في السنوات الاربعه الاخيره التي تابعتها فيها، اردت ان اتفقد الهاوية التي يقبل العالم عليها  فعبثت في الريموت واخذت اقلب حتي وصلت اليها.

وكانت أول الأخبار:" استنكر الرئيس اوباما ورؤساء وزراء كلا من بريطانيا والمانيا وكثيرا من الدول الاوربية و بعض رؤساء الدول الاسلاميه الهجوم الارهابي علي صحيفة "شارل إيبدو"، وتظاهر الالاف في بعض العواصم الاوربية استنكارا للموقف". ايقظ هذا الخبر كل الخلايه النائمة في عقلي بسبب الجو المثلج في صباح هذا اليوم الذي غابت الشمس عنه ليكتسي بوشاح الكئابة، وادرك عقلي انه يعرف اسم هذه الصحيفة وانها معتادة علي نشر ما يسيء للرسول والدين الاسلامي من وقت لأخر،وكانت اسائتهم مباشرة ليست لها علاقة بحرية ولا تعبير وكان كل هذا دون ان يتنطع اوباما او غيره حتي بالتعليق علي الامر.

استرجعت بذاكرتي حادثة مقتل كعب ابن الاشرف، وهو احد يهود المدينه الذي اعتاد علي هجاء الرسول والخوض في اعراض نسائة وحث المشركين علي قتله وغيره من المسلمين.  فسأل الرسول اصحابه الثأر، فخرج له محمد بن مسلمة وبعض الصحابه فقتلوه. قد يصرخ البعض عند هذه السطور،  ويتشدق بعنف الرسول عليه الصلاة والسلام وبالتالي عنف الدين الاسلام، ويتغافل عن كم الاذي الذي لحق بكثيرا من المسلمين داخل البلاد الغربية وحتي الاسلاميه نتيجة ما يتم نشره في العقول من كره وتحريض مستمر وابلغ دليل المظاهرات النازيه في المانيا والسويد وحرق المساجد وتتبع المسلمين والمسلمات وحتي اطفالهم في المدارس.

لن اطيل عليكم ما دار في ذاكرتي لان هذه الكلمات لن يدركها الا من كانت لديه نخوه، واما من فقدها فأرجو منه ان يسترجع ما فعلته امريكا وحلفائها في عراقنا الشقيق وغيره، او ما تفعله اسرائيل في اهلنا واطفالنا في فلسطين ليتفهم المعني الحقيقي لللأرهاب.

ورغم ما ذكرته، فهناك فكره اخري تداعب عقلي، فمن يتابع الاخبار سوف يدهشه التنظيم العجيب في الاحداث المتتالية للهجوم علي الاسلام والمسلمين حتي ان خاتمة اخبار الهجوم علي هذه الصحيفة تدعو الي السخرية بعد ما اعلنت الشرطة الفرنسية عن وجودها لبطاقة الهوية لاحد المسلمين في السيارة التي نفذت الهجوم وهل يعقل ذلك ؟!. وهو ما يشيير الى ان الموضوع قد لا يتعدي احد الافلام التي يشرف علي اخراجها وانتاجها بعض الصهاينة للوصول الي بعض المكاسب السياسية في بعض الدول الاوربيه وخارجها.

فجأه استوقف الخبر التالي الزورق الذي ابحرت به  في افكاري:" اعلنت السلطات المصريه عن بدء المرحلة الثانيه من المنطقه العازله لتضم مدينة رفح المصريه الحاليه"، هذا يعني انه تم اخلاء مدينة كامله من المصريين .......

اكتفيت بهذه الدقائق الخمس ونفضت عن كاهلي غبار الحماسه، واكملت اعداد افطاري حتي انزل لعملي وسط صفوف العبيد.